संत नामदेव महाराजांचे स्मारक पंढरपुरात उभारणार – केंद्रीय मंत्री मुरलीधर मोहोळ
संत शिरोमणी श्री नामदेव महाराज यांचा ६७५ वा संजीवन समाधी सोहळा मोठ्या उत्साहात संपन्न.
पुणे, २७ जुलै २०२५:
संत शिरोमणी श्री नामदेव महाराज यांचा ६७५ वा संजीवन समाधी सोहळा पुण्यातील गणेश कला क्रीडा मंच, स्वारगेट येथे अत्यंत उत्साहात व भक्तीभावात पार पडला. या भव्य दिव्य समारंभाचे आयोजन नामदेव समाजोन्नती परिषद, महाराष्ट्र यांच्या वतीने, पुणे व पिंपरी-चिंचवड शहर शाखा तसेच शहरातील विविध ज्ञाती संघटनांच्या सहकार्याने करण्यात आले होते.संत नामदेव महाराजांचे स्मारक पंढरपुरात उभारणार – केंद्रीय मंत्री मुरलीधर मोहोळ
समारंभाचे मुख्य आकर्षण ठरले केंद्रीय सहकार व नागरी विमान वाहतूक राज्यमंत्री मुरलीधर मोहोळ यांचे उपस्थितीत दिलेले महत्त्वाचे वक्तव्य. त्यांनी जाहीर केले की, “संत नामदेव महाराजांचे भव्य स्मारक पवित्र पंढरपूर नगरीत उभारण्यात येईल.” या घोषणेला उपस्थित हजारो भाविकांनी जोरदार प्रतिसाद दिला.
कार्यक्रमाचे वैशिष्ट्य
- सकाळी श्री विठ्ठल-रुख्मिणी आणि संत नामदेव महाराज यांच्या प्रतिमेचे विधिवत पूजन
- ज्येष्ठ नागरिकांचा सहस्त्रदर्शन सोहळा आणि धान्यतुला, जे धान्य विविध सामाजिक संस्थांना दान करण्यात आले
- दुपारी ‘मोगरा फुलला’ या अभंगवाणीवरील सांस्कृतिक कार्यक्रमाचे आयोजन
- संध्याकाळी मान्यवरांचा सन्मान
पुरस्कार वितरण सोहळा:
- माजी आमदार प्रकाश देवळे यांना समाजभूषण पुरस्कार
- आय.पी.एस अधिकारी रोहन बोत्रे (मिझोराम) यांना समाजरत्न पुरस्कार देऊन गौरव
या कार्यक्रमात नामदेव समाजोन्नती परिषदेचे अध्यक्ष संजय नेवासकर, उच्च शिक्षण मंत्री चंद्रकांत पाटील, संत नामदेव महाराजांचे १६ वे वंशज मुकुंद महाराज, तसेच राज्यातील अनेक आमदार, नगरसेवक, समाज बांधव आणि शिंपी समाजाचे नागरिक मोठ्या संख्येने उपस्थित होते.
या ऐतिहासिक सोहळ्यात सामाजिक, धार्मिक व सांस्कृतिक रंगांनी भर घालणाऱ्या या कार्यक्रमामुळे उपस्थित भाविकांच्या मनात समाधानाची भावना निर्माण झाली.
