“कोणता हा झेंडा घेऊ हाती? विमाननगर–लोहगाव मधील इच्छुक उमेदवारांची परिस्थिती

विमाननगर–लोहगावमध्ये इच्छुक उमेदवार संभ्रमात पठारे यांच्या संभाव्य पक्षप्रवेशामुळे निर्णय प्रक्रिया रखडली

पुणे | प्रतिनिधी

आगामी महापालिका निवडणुकीच्या पार्श्वभूमीवर पुण्यातील राजकीय हालचालींना वेग आला असला, तरी विमाननगर–लोहगाव परिसरात अद्याप उमेदवारीबाबत स्पष्टता नसल्याचे चित्र आहे. विविध पक्षांकडून इच्छुक उमेदवारांची संख्या वाढली असली, तरी कोणत्या पक्षाकडून तिकीट मिळणार याबाबत ठोस निर्णय झालेला नाही, त्यामुळे इच्छुकांमध्ये संभ्रमाचे वातावरण निर्माण झाले आहे.

विशेषतः सुरेंद्र पठारे यांच्या संभाव्य राजकीय प्रवेशामुळे अनेक पक्षांमध्ये अंतर्गत चर्चांना वेग आला असून, त्यामुळे उमेदवारी निश्चित करण्याची प्रक्रिया तात्पुरती थांबवण्यात आल्याची चर्चा राजकीय वर्तुळात आहे. “कोणता हा झेंडा घेऊ हाती?” अशी अवस्था अनेक इच्छुक उमेदवारांची झाल्याचे स्थानिक पातळीवर बोलले जात आहे.

दरम्यान, पठारे यांच्या दावणीला ‘पाटील’ नावांची भर पडणार असल्याचीही चर्चा असून, त्यामुळे प्रभागातील समीकरणे आणखी गुंतागुंतीची होत असल्याचे चित्र आहे. काही इच्छुक उमेदवार पर्यायी राजकीय पर्यायांची चाचपणी करत असल्याची माहितीही सूत्रांकडून मिळत आहे.

राजकीय जाणकारांच्या मते, येणाऱ्या काही दिवसांत प्रमुख पक्षांकडून उमेदवारीबाबत स्पष्ट संकेत दिले जाण्याची शक्यता असून, त्यानंतरच विमाननगर–लोहगाव प्रभागातील राजकीय चित्र अधिक स्पष्ट होणार आहे. अंतिम उमेदवारी कोणाला मिळणार, याकडे आता स्थानिक कार्यकर्ते आणि मतदारांचे लक्ष लागले आहे.