पुणे महापालिका निवडणूक: भाजपाकडून गणेश बिडकरांचा पहिला उमेदवारी अर्ज दाखल, प्रभाग क्र. २४ मधून मैदानात

पुणे महानगरपालिका निवडणुकीसाठी उमेदवारी अर्ज दाखल करण्यास अवघा एक दिवस उरलेला असताना अद्यापही प्रमुख पक्षांकडून अधिकृत उमेदवारांची घोषणा झालेली नाही. मात्र दुसरीकडे उमेदवारी निश्चित झालेल्या काही उमेदवारांना थेट पक्षाकडून एबी फॉर्म देण्यात आले असून, भारतीय जनता पक्षाकडून पुणे महापालिका निवडणुकीसाठीचा पहिला अधिकृत उमेदवारी अर्ज माजी सभागृह नेते आणि निवडणूक प्रमुख गणेश बिडकर यांच्या रूपाने आज दाखल करण्यात आला.भवानी पेठ क्षेत्रीय कार्यालयामध्ये प्रभाग क्रमांक २४ मधून गणेश बिडकर यांनी सोमवारी सकाळी राज्याचे उच्च व तंत्र शिक्षण मंत्री चंद्रकांतदादा पाटील आणि आमदार हेमंत रासने यांच्या उपस्थितीत आपला उमेदवारी अर्ज दाखल केला. यावेळी मोठ्या संख्येने कार्यकर्ते आणि पदाधिकारी उपस्थित होते.

अर्ज दाखल केल्यानंतर माध्यमांशी बोलताना गणेश बिडकर यांनी महायुतीच्या विजयाबाबत ठाम विश्वास व्यक्त केला. ते म्हणाले की, “लोकसभा आणि विधानसभा निवडणुकीत पुणेकरांनी भाजपाला भरभरून मतदान केले आहे. त्यामुळे पुणे महानगरपालिका निवडणुकीतही पुणेकर महायुतीच्या पाठीशी ठामपणे उभे राहतील. प्रभागातील सर्व उमेदवार मोठ्या मताधिक्याने विजयी होतील, असा मला पूर्ण विश्वास आहे.”संपूर्ण पुणे शहरात भाजपाची अधिकृत उमेदवारी मिळवून उमेदवारी अर्ज दाखल करणारे गणेश बिडकर हे पहिले उमेदवार ठरले आहेत. त्यांच्या सोबत प्रभाग क्रमांक २४ मधील इतर तिन्ही उमेदवारांनीही आपले उमेदवारी अर्ज दाखल केले आहेत.

यावेळी पुढे बोलताना बिडकर म्हणाले, “पुणे हे जगातील सर्वात महत्त्वाच्या शहरांपैकी एक व्हावे, यासाठी आमचा सातत्याने प्रयत्न राहिला आहे. मागील कार्यकाळात आम्ही अनेक मोठे विकास प्रकल्प पूर्णत्वास नेले. येत्या कार्यकाळात पुण्याच्या सर्वांगीण विकासासाठी अधिक गतीने काम करत शहराला आणखी पुढे नेण्याचा आमचा संकल्प आहे.”महापालिका निवडणुकीच्या पार्श्वभूमीवर भाजपाकडून दाखल झालेला हा पहिला उमेदवारी अर्ज राजकीय वर्तुळात चर्चेचा विषय ठरला असून, आगामी निवडणुकीत महायुतीची रणनिती आणि ताकद दाखवणारा महत्त्वाचा टप्पा मानला जात आहे.