राजकारणापलीकडची माणुसकी अधोरेखित! गणेश बिडकरांची दिवंगत नेत्यांच्या कुटुंबीयांना सदिच्छा भेट

महापालिका निवडणुकीच्या रणधुमाळीत प्रचार, बैठका आणि राजकीय गणिते सुरू असताना प्रभाग क्रमांक २४ (ड) चे उमेदवार तसेच माजी सभागृह नेते गणेश बिडकर यांनी राजकारणापलीकडील जिव्हाळ्याच्या नात्यांना प्राधान्य देत पुणे शहराच्या राजकीय व सामाजिक जीवनात महत्त्वपूर्ण योगदान देणाऱ्या दिवंगत नेत्यांच्या कुटुंबीयांची सदिच्छा भेट घेत संवाद साधला.दिवंगत माजी महापौर स्व. मोहनसिंग राजपाल यांच्या निवासस्थानी भेट देत गणेश बिडकर यांनी राजपाल कुटुंबीयांची आपुलकीने चौकशी केली. स्व. मोहनसिंग राजपाल महापौर असताना गणेश बिडकर यांना स्थायी समितीचे अध्यक्ष म्हणून काम करण्याची संधी मिळाली होती. या आपुलकीच्या भेटीदरम्यान त्या काळातील अनेक आठवणींना उजाळा मिळाला.

यावेळी कुटुंबीयांशी संवाद साधताना गणेश बिडकर म्हणाले, “स्वर्गीय मोहनसिंग राजपाल यांचा प्रदीर्घ अनुभव, शिस्तबद्ध कार्यपद्धती आणि सर्वसमावेशक व संयमी स्वभाव जवळून अनुभवण्याची संधी मला मिळाली. पुण्याचे पहिले शीख महापौर म्हणून त्यांनी घेतलेले अनेक दूरदृष्टीपूर्ण व धाडसी निर्णय आजही शहराच्या विकासासाठी दिशादर्शक ठरत आहेत.”दरम्यान, काँग्रेसचे माजी नगरसेवक स्व. सीतारामभाऊ थोपटे तसेच माजी नगरसेविका स्व. शोभाताई बारणे यांच्या निवासस्थानीही गणेश बिडकर यांनी भेट देत कुटुंबीयांशी संवाद साधला व सदिच्छा व्यक्त केल्या.निवडणूक म्हणजे केवळ सत्ता, आकडेमोड आणि राजकीय स्पर्धा नव्हे, तर शहराच्या जडणघडणीत मोलाचे योगदान देणाऱ्या नेत्यांचा सन्मान राखणे आणि त्यांच्या कुटुंबीयांशी आपुलकी जपणेही तितकेच महत्त्वाचे असते, हे या भेटींमधून अधोरेखित झाले.

राजकारणापलीकडील नाती जपणाऱ्या गणेश बिडकर यांच्या या संवेदनशील आणि मानवी दृष्टिकोनातून केलेल्या कृतीचे सर्व स्तरांतून कौतुक होत आहे.